YOYO ՀԱՎԵԼՎԱԾՈՎ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ՀՐԱՊԱՐԱԿԱՅԻՆ ՊԱՅՄԱՆԱԳԻՐ
1․ Կարգավորման առարկան
1․1. «Ֆասթ Շիֆթ» սահմանափակ պատասխանատվությամբ ընկերության YoYo հավելվածով ծառայությունների մատուցման հրապարակային պայմանագրով (այսուհետ՝ Պայմանագիր) սահմանվում է «Ֆասթ Շիֆթ» ՍՊԸ (այսուհետ՝ նաև Ընկերություն) էլեկտրոնային փողով հաշվարկների իրականացման համակարգում էլեկտրոնային վճարային միջոցների օգտագործման համար YoYo բջջային հավելվածում Հաշվառման հաշվի բացման, համալրման և օգտագործման պայմանները։
1.2. Պայմանագիրը, ՀՀ գործող Քաղաքացիական օրենսգրքին համապատասխան, «Ֆասթ Շիֆթ» ՍՊԸ հայտարարած ծառայություններից օգտվելու պաշտոնական գրավոր հրապարակային առաջարկ է (այսուհետ՝ Օֆերտա)՝ ուղղված ֆիզիկական անձանց։
2․ Ընդհանուր դրույթներ
2.1. Oֆերտան կարող է ներկայացվել առցանց կամ Ընկերության սահմանած այլ եղանակով:
2.2. Ընդունելով Օֆերտան՝ Օգտատերը (Ընտանիքի անդամը) հաստատում է, որ ամբողջությամբ ծանոթացել է և անվերապահ ընդունում է Պայմանագրի անխտիր բոլոր պայմանները, ծառայություններից օգտվելու կանոններն ու ծառայությունների դիմաց գանձվող վճարները, որոնց գործող տարբերակները զետեղված են Ընկերության պաշտոնական կայքում և (կամ) ներկայացված են Ընկերության թողարկած YoYo բջջային հավելվածում:
2.3. Ծառայությունների տեսակների, դրանց մատուցման եղանակների, հնարավոր գործառնությունների, ժամկետների, Ծառայությունների համար սահմանված միջնորդավճարների վերաբերյալ տեղեկատվությունը տեղադրվում է Ընկերության պաշտոնական կայքում, միջնորդավճարների մասին նաև իրազեկվում է նախքան յուրաքանչյուր Գործարքի կատարումը:
2.4. YoYo բջջային հավելվածում բացված Հաշվառման հաշվով կատարվող ցանկացած գործառնության պատասխանատուն Ընտանիքի անդամն է։
2.5. Օգտատերերի ինքնաշխատ եղանակով սպասարկումն Ընկերությունն իրականացնում է 24/7 ռեժիմով։ Պայմանագրով սահմանված գործողությունները, որոնք չեն իրականացվում ինքնաշխատ եղանակով, Ընկերությունն իրականացնում է իր ընդունած ներքին իրավական ակտերով սահմանված աշխատանքային օրերին ու ժամերին, որոնք ներկայացվում են պաշտոնական կայքում և (կամ) YoYo բջջային հավելվածում։
2.6. Էլեկտրոնային փողով հաշվարկների իրականացման համակարգում հաշվարկները կատարվում են ՀՀ դրամով։
2.7. Թողարկված 1 (մեկ) միավոր էլեկտրոնային փողը հավասար է 1 (մեկ) ՀՀ դրամի։
3. Հիմնական հասկացություններ
3.1. Ընկերության էլեկտրոնային փողով ծառայությունների մատուցման հրապարակային պայմանագրում օգտագործվող հասկացությունները հավասարապես կիրառելի են նաև Օֆերտայի նկատմամբ, եթե Օֆերտայում այլ բան նախատեսված չէ,
3.2. Օգտատեր՝ ՀՀ գործող օրենսդրության համաձայն չափահասության տարիքը չլրացած ֆիզիկական անձ,
3.3. Օգտատիրոջ գրանցում՝ Համակարգում Օգտատիրոջ անունով Հաշվառման հաշվի բացում (գրանցում)։
3.4. Ծառայություններ՝ YoYo բջջային հավելվածում մատուցվող հետևյալ ծառայությունները․
3.4.1. QR վճարումներ,
3.4.2. բջջային հեռախոսահամարի հաշվի համալրում,
3.4.3. գումարի ստացում բացառապես ընտանիքի անդամներից,
3.4.4. գումարի փոխանցում բացառապես ընտանիքի անդամներին,
3.4.5. գումարի հայցում բացառապես ընտանիքի անդամներից,
3.4.6. բջջային հեռախոսի լիցքավորման շարժական կայաններից սարքերի վարձակալման դիմաց վճարում,
3.4.7. YoYo բջջային հավելված ընկերներին հրավիրելու հնարավորություն,
3.5. YoYo բջջային հավելված՝ Ընկերության կողմից շարժական սարքերում աշխատանքի ծրագրային ապահովում, որի միջոցով հասանելի է Հաշվի կառավարումը և Ծառայություններից օգտվելը՝ Օֆերտայով սահմանված պայմաններով,
3.6. Ընտանիքի անդամ՝ Օգտատիրոջ օրինական ներկայացուցիչ՝ հայր, մայր, քույր, եղբայր, խնամակալ։
4. Պայմանագրի կնքումը (ակցեպտավորումը) և գործողության ժամկետը
4.1. Պայմանագրի ակցեպտավորում (ընդունում) է համարվում Ընտանիքի անդամի կողմից Օգտատիրոջ նույնականացումը։
4.2. Պայմանագրի ակցեպտավորումը նշանակում է Պայմանագրի բոլոր պայմանների լիովին և անվերապահ ընդունում՝ առանց որևէ բացառության կամ սահմանափակման, և հավասարազոր է գրավոր կնքված պայմանագրին։
4.3. Պայմանագրի ակցեպտավորումը ժամկետային սահմանափակում չունի։
4.4. Պայմանագրի շրջանակներում բոլոր ծանուցումները կատարվում են էլեկտրոնային եղանակով՝ էլեկտրոնային փոստի, Ընկերության պաշտոնական կայքի, Բջջային հավելվածի կամ կարճ հաղորդագրությունների միջոցով, որոնք համարվում են պատշաճ ծանուցում:
5. Հաշվառման հաշվի բացում և նույնականացում
5.1. YoYo բջջային հավելվածում Հաշվառման հաշիվ բացելու (գրանցելու) համար․5.1.1. Օգտատերը (Ընտանիքի անդամը) մուտքագրում է իր հեռախոսահամարը, որին Ընկերությունն ուղարկում է հաստատման մեկանգամյա ծածկագիր,
5.1.2. եթե Oգտատերը (Ընտանիքի անդամը) մուտքագրել է սխալ հեռախոսահամար, ինչի պատճառով չի ստացել հաստատման ծածկագիր, նորից է անցնում գրանցման գործընթացը, որից հետո ստանում է հաստատման նոր ծածկագիր,
5.1.3. հաստատման ծածկագրի մուտքագրումից հետո Oգտատերը (Ընտանիքի անդամը) ստեղծում է գաղտնաբառ (PIN կոդ):
5.2. Օֆերտայի 5.1 կետով սահմանված կարգով գրանցման գործընթացից հետո․
5.2.1. տրամադրվում է Հաշվառման հաշվի նույնականացման եզակի, չկրկնվող համար` ID,
5.2.2. գեներացվում է QR կոդ՝ Ընտանիքի անդամի կողմից Օգտագործողին նույնականացնելու նպատակով։
5.3. Օգտագործողին նույնականացնելու համար Ընտանիքի անդամը․
5.3.1. Իր Fast Shift բջջային հավելվածով սկանավորում է 5.2. կետով սահմանված կարգով գեներացված QR կոդը,
5.3.2. որոշակիացնում է՝ Ընտանիքի որ անդամն է ինքը,
5.3.3. նշում է Օգտատիրոջ․
ա) անունը, ազգանունը,
բ) սեռը,
գ) ծննդյան ամսաթիվը,
5.3.4. մուտքագրում է ծննդյան վկայականի համարը,
5.3.5. ներբեռնում է ծննդյան վկայականի նկարը,
5.3.6. նշում է Օգտատիրոջ դպրոցի անվանումը, հասցեն,
5.3.7. հաստատում է լրացված տվյալները։
6. Հաշվառման հաշվի օգտագործում
6.1. Օգտատերը օգտվում է Օֆերտայով սահմանվող Ծառայություններից։
6.2. Օգտատիրոջ Հաշվառման հաշվում առկա գումարը յուրաքանչյուր պահի չի կարող գերազանցել 1 000 000 (մեկ միլիոն) ՀՀ դրամը։
6.3. Հաշվառման հաշվով կատարվող 1 (մեկ) գործարքի առավելագույն սահմանաչափն է 100 000 (հարյուր հազար) ՀՀ դրամը։
6.4. Օգտատիրոջ յուրաքանչյուր գործարքի վերաբերյալ ծանուցում է ստանում Ընտանիքի անդամը։
6.5. Օգտատերը (Ընտանիքի անդամը) իր Հաշվառման հաշվի մուտքային տվյալները ստեղծում է ինքնուրույն, կարող է գաղտնաբառը փոխել ցանկացած ժամանակ և անսահմանափակ քանակությամբ։
6.6. Օգտատերը (Ընտանիքի անդամը) կրում է իր մուտքային տվյալների գաղտնիության պահպանման ողջ պատասխանատվությունը։ Հաշվի հետ կապված ցանկացած գործողություն, որը կատարվել է պատշաճ մուտքային տվյալների օգտագործմամբ, համարվում է Օգտատիրոջ կողմից կատարված՝ բացառությամբ ՀՀ օրենսդրությամբ սահմանված դեպքերի։
6.7. YoYo բջջային հավելվածում բացված Հաշվառման հաշվի մուտքային տվյալների կորստի դեպքում Ընկերությունը Օգտատիրոջը (Ընտանիքի անդամին) թույլ է տալիս վերականգնել Հաշիվ մուտք գործելու հնարավորությունը՝ վերականգնման ծածկագրի մուտքագրման միջոցով, որը տրամադրվում է Օգտատիրոջ (Ընտանիքի անդամի) հրահանգով՝ Հաշվառման հաշվին կցված էլեկտրոնային հասցեին կամ Օգտատիրոջ (Ընտանիքի անդամի) մուտքագրած բջջային հեռախոսահամարին կամ կապի այլ միջոցով հաղորդագրություն ուղարկելով։
6.8. Օգտատիրոջ (Ընտանիքի անդամի) մուտքային տվյալների օգտագործմամբ Ընկերությանը ուղարկած վճարման հրահանգը պատշաճ և բավարար է՝ Օգտատիրոջը (Ընտանիքի անդամին) նույնականացնելու համար։
6.9. Օգտատերը (Ընտանիքի անդամը) կարող է ցանկացած ժամանակ միակողմանի լուծել Պայմանագիրը և փակել իր Հաշիվը՝ իր նույնականացման տվյալների օգտագործմամբ դիմում ներկայացնելով Ընկերության պաշտոնական էլեկտրոնային հասցեով ([email protected]):
6.10. Պայմանագիրը լուծվում և Հաշիվը փակվում է Ընկերության ներքին իրավական ակտերով սահմանված կարգով և ժամկետներում։
7. Այլ պայմաններ
7.1. Ընկերության էլեկտրոնային փողով ծառայությունների մատուցման հրապարակային պայմանագրով սահմանված իրավունքներն ու պարտականությունները, բողոքների քննարկման ընթացակարգը, գաղտնիության պահպանման կարգը, հավասարապես կիրառելի են նաև Օֆերտայի նկատմամբ, եթե Օֆերտայում այլ բան նախատեսված չէ։
7.2. Պայմանագրով սահմանված պարտավորությունների չկատարման կամ ոչ պատշաճ կատարման համար Ընկերությունը և Ընտանիքի անդամը պատասխանատվություն են կրում ՀՀ օրենսդրությամբ սահմանված կարգով։
7.3. Ընկերությունը պատասխանատվություն չի կրում իրենից անկախ պատճառներով փոստային, ինտերնետ և կապի այլ ծառայությունների խափանման, ինչպես նաև Օգտատիրոջ (Ընտանիքի անդամի) հետադարձ կապի տվյալների փոփոխման պատճառով Օգտատիրոջ (Ընտանիքի անդամի) ժամանակին ծանուցում չստանալու համար։
7.4. Ընկերությունը պատասխանատվություն չի կրում Պայմանագրով սահմանված իր պարտավորությունները կապի, էներգամատակարարման և տեխնիկական այլ խափանումների պատճառով չկատարելու համար։
7.5. Ընկերությունը պատասխանատվություն չի կրում YoYo բջջային հավելվածում բացված Հաշվառման հաշվով երրորդ անձանց կատարած Գործարքների և (կամ) Օգտատիրոջ նույնականացման և (կամ) մուտքային տվյալների բացահայտման համար, եթե դա տեղի է ունեցել Հաշվի օգտագործման ժամանակ կապուղիների գաղտնալսման և (կամ) տվյալների առևանգման հետևանքով։
7.6. Ընկերությունը պատասխանատվություն չի կրում YoYo բջջային հավելվածում բացված Հաշվառման հաշվի կառավարման վավերապայմանները երրորդ անձանց տրամադրվելու կամ կորստի դեպքում։
7.7. Հաշվի կառավարման վավերապայմանների կորստյան կամ փոփոխման հետևանքով դրանք երրորդ անձանց հայտնի դառնալու կասկածի դեպքում Ընտանիքի անդամը պարտավոր է Ընկերության սահմանած կարգով անհապաղ տեղեկացնել վերջինիս: Մինչև վավերապայմանների արգելափակումը կամ փոփոխումը Ընտանիքի անդամըկրում է դրանց չարտոնված օգտագործման հետևանքների ռիսկերը, այդ թվում` Ընկերությանը պատճառված վնասների պատասխանատվությունը:
7.8. Ընկերությունը և Ընտանիքի անդամը ազատվում են Պայմանագրով սահմանված իրենց պարտավորությունները մասամբ կամ ամբողջությամբ չկատարելու պատասխանատվությունից, եթե դրա պատճառը անհաղթահարելի իրավիճակներն են՝ հրդեհ, ջրհեղեղ, երկրաշարժ, կապուղիների, էներգամատակարարման խափանում և նրանց վերահսկողությունից դուրս այլ իրավիճակներ, օրինակ՝ Ընկերությունից անկախ պատճառով կապի խափանման հետևանքով Համակարգի հնարավոր ընդհատումները, ինչպես նաև ՀՀ պետական մարմինների որոշումների, վճիռների և իրավական այլ ակտերի ընդունման դեպքում, որոնք խոչընդոտում են Պայմանագրով սահմանված պարտավորությունների կատարումը։
7.9. Օգտատիրոջ Ընտանիքի անդամը երաշխավորում է, որ
7.9.1. Պայմանագրի պայմաններն իրեն հասկանալի են և ամբողջությամբ ու անվերապահ ընդունելի,
7.9.2. Օգտատիրոջ Հաշիվը չի օգտագործվելու անօրինական գործողությունների կատարման համար։
7.10. Պայմանագիրը կարգավորվում և մեկնաբանվում է ՀՀ օրենսդրությամբ սահմանված կարգով։